आमचे प्रणेते

श्रीयुत चंद्रकांत ठाकूरदास हे बाल प्रबोधिनी संस्थेचे प्रणेते आणि संस्थापक देखील आहेत. विद्यार्थ्यांना शिक्षण विषयक एक निश्चित नजर प्राप्त होऊन त्यांचा उत्तम शैक्षणिक विकास व्हावा हे प्रयोजन डोळ्यासमोर ठेवून संस्थापकांनी ही संस्था स्थापन केली. ‘ना नफा ना तोटा' या तत्त्वावर या संस्थेची सुरुवात केली आणि आजमितीपर्यंत त्याच पद्धतीने कार्य चालू आहे.

श्रीयुत चंद्रकांत ठाकूरदास, ज्यांना आदरयुक्त प्रेमाने 'भाऊ'या नावाने जग ओळखतं, त्यांनी मनावर ३६ वर्षे अथक संशोधन केलं. त्यातून त्यांना काही ठोस निष्कर्ष हाती आले. सर्व भौतिक सुविधांची रेलचेल असूनही माणूस आनंदी का नाही? या प्रश्नाचे उत्तर आणि त्यावर अचूक उपाय ह्या दोन्ही गोष्टी त्यांच्या या संशोधनाचे फलित आहे असं म्हणल्यास अतिशयोक्ती नाही. केवळ फलित हाती घेऊन न थांबता त्यांनी ते पडताळून पाहण्यासाठी राजा शिवाजी विद्यालय, दादर, पूर्व या ठिकाणी प्रौढांसाठी विज्ञान प्रबोधिनी १९९५ पासून सुरू केली. ही प्रबोधिनीच्या माध्यमातून माणसांच्या मनाच्या विविध अवस्था दाखविणारी एक प्रयोगशाळाच त्यांच्या समोर आली. आपल्या संशोधन कार्यातून हाती आलेले निष्कर्ष कोणताही पडदा न ठेवता त्यांनी समाजासमोर मांडले. ज्याची जशी अवस्था तशी त्याची गरज. आणि प्रत्येक व्यक्तीला आपल्या प्रश्नाचं उत्तर सापडत गेलं. अल्पावधीतच लोक आनंदी जीवनाची वाटचाल करू लागले. या प्रबोधिनीत सर्व स्तरामधील, विविध कौटुंबिक, सामाजिक परिस्थितीची पार्श्वभूमी असलेल्या आबालवृद्ध व्यक्तींचा समावेश होता. या विभिन्नतेमध्ये आनंदी मनाची अवस्था हा एक समान धागा होता. हे सर्व पाहून परमपूज्य भाऊंना जाणवलं की कोणत्याही वयाच्या टप्प्यावर व्यक्ती मनाच्या या विज्ञानाच्या आधारावर आमूलाग्र बदलू शकते. त्यामुळे त्यांनी असा विचार केला की जर हे विज्ञानमन तयार होणाऱ्या वयाच्या टप्प्यावर दिलं गेलं तर व्यक्तीची जडणघडण निश्चितच उत्तम होईल. अर्थात असा टप्पा म्हणजे पौगंडावस्था. कारण याच काळात शारीरिक,बौद्धिक आणि मानसिक वृध्दीचा वेग प्रचंड असतो. तेव्हा याच वळणावर जर उत्तम विचार आणि संस्कारांची शिदोरी मिळाली तर प्रत्येक विद्यार्थी भविष्यात एक उत्तम व्यक्ती घडेल. मनाच्या विज्ञानाच्या पायावर आधारित त्यांनी बाल प्रबोधिनी हा एक नाविन्यपूर्ण आणि शैक्षणिक दृष्ट्या परिपूर्ण असा उपक्रम तयार केला.

संस्थेचं यश

विद्यार्थ्यांची लक्षणीय प्रगती, मुलांच्या वागण्यात सकारात्मक बदल, शालेय विषय कसे शिकायचे याविषयीची निश्चित नजर विद्यार्थ्यांना प्राप्त झालेली आहे. मुलांची अभ्यासात वाढलेली रुचि हे मुख्याध्यापक आणि शाळांमधील शिक्षकांच्या निदर्शनास आलं. उपक्रमास पालकांचीही पसंती मिळाली. बाल प्रबोधिनीच्या तासिकेची विद्यार्थ्यांनी आतुरतेनं वाट पहाणं, पुढच्या वर्षी सुद्धा तुम्ही या असा आग्रह धरणं, हे सर्वात मोठं प्रशास्तिपत्रक बाल प्रबोधिनीला मिळालेलं आहे.

संस्थेची कार्यपद्धती

शैक्षणिक विकास

२००९ पासून आजमितीपर्यंत अनेक शाळांमधून हा उपक्रम राबविण्यात आला आहे

स्वयंसेवी शिक्षक प्रशिक्षण

२००९ पासून आजमितीपर्यंत साडे तीनशे पेक्षा अधिक व्यक्तींना स्वयंपूर्ण शिक्षक प्रशिक्षण देण्यात आले

व्यक्तिमत्व विकास

२००९ पासून आजमितीपर्यंत अनेक शाळा, दूरस्थ शाळा, अनाथाश्रम यांमध्ये हा उपक्रम दिला गेला आहे

फलश्रुति

२००९ पासून आजमितीपर्यंत ७५,००० पेक्षा अधिक विद्यार्थ्यांना या उपक्रमाचा लाभ मिळाला आहे